Еден од најдобрите белгиски фудбалери во последната деценија, Еден Азар, нема иднина во Реал Мадрид, барем не додека тренер е Карло Анчелоти. Тој постојано се мачи и со некакви повреди, не ги оправда големите пари кои Кралскиот клуб ги потроши за да го донесе од Челзи, а сега Азар има изненадувачка понуда од Вестерло, тим кој е белгиски второлигаш.
Вестерло речиси сигурно ќе влезе во првата лига и има големи амбиции и во елитното друштво, па сака да го привлече Азар. Инаку, сопственик на Вестерло е турскиот бизнисмен Октај Ерџан.
Азар има петгодишен договор со Реал, изјавува дека сака да му се оддолжи на клубот, но вишокот килограми и повредите придонесоа за неговата слаба форма и тој сега е резерва на разиграниот Винисиус, кој сезонава е незаменлив како главно лево крило.
