Рафаел Надал се пријави виртуелниот Мастерс турнир кој се организира како замена за Мастерс турнирот во Мадрид. Организаторите на модерното натпреварување го потврдија учеството на вториот светски рекет, а исто така ќе учествуваат и Џон Изнер, Кики Бертенс, Фиона Феро, додека од претходно учеството го потврдија Енди Мареј, Анџелика Кербер, Карла Наваро и Лука Пуј.
„ Среќен сум што ќе учествувам во виртуелниот турнир. Од изолација, со охрабрување кое го даваме едни на други, да помогнеме на оние кои им е потребна наша помош. Не сум сигурен како ќе се снајдам и дали ќе одиграм добро, но како и секогаш ќе дадам сè од себе“, истакна Надал.
На турнирот ќе учествуваат по 16 тенисери и тенисерки во двете конкуренции, а ќе се одржи од 27 до 30 април. Победниците ќе добијат по 150.000 евра како главна награда, а од истата сами ќе одлучат колку ќе издвојат за да донираат на тенисерите кои се во финансиски проблеми поради откажаните турнири.
