Вечерашното гостување (почеток 19 часот) во Рига против Украина, ќе биде последен меч за женската кошаркарска репрезентација на Македонија во квалификациите за Европското првенство, и последен настап за 30-годишната Нена Трајчевска во дресот на националниот тим.
Македонската селекција одамна нема шанса да се најде на Евробаскетот, а и вечерва ќе биде поразена, прашање е само со колку поени разлика, во Sport Life основната хендикеп граница е поставена на 27,5 поени разлика.
Трајчевска би брани државните бои од 2010 година, а по 15 години играње во националниот тим одлучи да стави крај на репрезентативната кариера.
„Очекувам како и секогаш да дадеме сѐ од себе за боите на овој дрес. Но, највеќе од сѐ сакам да уживаме, поготово што мене ќе ми е последен натпревар за репрезентацијата. Оваа одлука ја донесов заради големиот физички напор и повредата која ме мачи веќе подолго време и не сум на ниво кое е потребно да ѝ помогнам на екипата. После 15 години активно играње за сите генерации, си одам со многу незаборавни поминати предизвици и најубави спомени со девојките кои сме израснале заедно, како кошаркарки и уште поважно како девојки и жени“, вели Трајчевска.
Таа им се заблагодари на сите соиграчи, тренери и работници кои биле дел од нејзиниот пат, а на младите им посака да ги надминат резултатите на нејзината генерација.
„Честа и гордоста што сум ги носела на теренот како Македонка, се секогаш главните емоции кои ме воделе и се надевам дека истото го пренесов на младите девојки, да ја преземат лидерската улога и да почнат да освојуваат многу поголеми врвови од тоа што оваа наша генерација има направено. Јас со целото мое срце верувам дека тоа е возможно, само да им се дадат вистински услови на овие девојки да се развиваат и да се натпреваруваат на ова ниво. Секогаш ќе ја имаат мојата поддршка, без разлика што како играч нема да сум до нив на теренот“, додава Трајчевска.
