Македонскиот фудбалер Елиф Елмас, во разговар за неаполското радио „ЦРЦ“, раскажа за најинтересните моменти од Суперкупот на Италија во Ријад и други теми како на пример на која позиција на теренот мисли дека му одговара најмногу.
„Беше прекрасно освојувањето на Суперкупот, наш прв трофеј во сезоната. Одигравме два одлични натпревари и го донесовме овој божиќен подарок во Неапол. Освојувањето на овој трофеј беше важно за нас. Јас како вајлд-карта? Да се биде разновиден играч не е лесно има многу предизвици. Сакам да играм зад напаѓачот, мислам дека оваа позиција е совршена за мене бидејќи можеш да постигнуваш голови, да дриблаш и да даваш асистенции. Во последно време ја играм мојата позиција малку повеќе, по пет недели играње како играч од средниот ред. Не е лесно да се менуваат улогите, но се обидувам да дадам максимум. Се обидувам да разберам што тренерот Конте бара од мене за да можам да направам квалитативен скок. Барањата на тренерот се менуваат, се обидувам да го следам она што ми го кажува“, вели Елмас.
Елиф проговори и за освојувањето на Скудетото во 2023.
„Тоа само треба да го доживеете. Освојувањето на Скудетото во Неапол по 33 години беше посебно. Дури и за оние кои го гледале Марадона како освојува титули, повторното освојување по 33 години беше необјасниво чувство. Со Спалети се инсистираше на посед на топката, овој тим на Конте е многу пофизички. Тие се различни тимови, но двата се добро изградени. Пристигнав тука во 2019 година, бев дете, а сега станувам маж. Научив толку многу работи за животот и фудбалот, среќен сум тука. Не знам што ми носи иднината, ајде да видиме дали можам да одиграм 300 натпревари за Наполи, но дури и 200 се големо достигнување. Најдобри желби до сите навивачи на Наполи за 2026 година!“, додаде Елмас.
