Британецот Енди Мареј, еден од најголемите тенисери на 21 век и првиот со две олимписки титули, објави дека ќе ја заврши својата кариера по Игрите во Париз.
Мареј, кој се смета за еден од најголемите британски спортисти на сите времиња, го освои олимпиското злато во Лондон во 2012 година, победувајќи го Роџер Федерер во финалето, а четири години подоцна во Рио де Жанеиро успешно ја одбрани титулата против Хуан Мартин дел Потро.
Триесет и седумгодишниот тенисер, кој стави крај на 77-годишното чекање со освојување на британската титула на Вимблдон во 2013 година и повторно во 2016 година, претходно изјави дека е малку веројатно да продолжи да игра по крајот на оваа година.
„Пристигнувам во Париз за моето последно тениско натпреварување“, напиша Шкотланѓанецот на својот профил на социјалната мрежа „X“.
„Да се натпреварувам за Велика Британија, беа најнезаборавните недели во мојата кариера и јас сум исклучително горд што ќе го сторам тоа уште еднаш, за последен пат“, додаде тој.
Мареј доби ѕвездено испраќање од публиката на Вимблдон претходно овој месец, откако испадна во првиот круг во двојки со неговиот брат Џејми.
Енди Мареј се подложи на операција на 22 јуни за да му биде отстранета циста од неговиот ‘рбетен столб, која ги притискаше нервите и предизвикуваше губење на контролата врз неговата десна нога.
Тенискиот турнир на Олимписките игри започнува на 27 јули, а Мареј, кој дебитираше на овие натпреварувања во Пекинг во 2008 година, ќе игра во сингл и во двојки.
Енди Мареј ја возобнови својата кариера откако ги смени колковите во 2019 година, но не успева да стигне до подоцнежните фази на големите турнири, а оваа сезона беше измачуван и од повреда на зглобот.
