Шпанецот Карлос Алкарас се пласира во финалето на Отвореното првенство на Австралија откако во неверојатно драматична пресметка го победи Александер Зверев со 3-2 во сетови (6-4, 7-6, 6-7, 6-7, 7-5), по пет и пол часа атомски тенис. Титулата во Мелбурн е единствената што му недостига на Алкарас досега во кариерата.
Шпанецот подобро го отвори мечот и го освои првиот сет со 6-4 во гемови. Потоа следеше вистинска драма, дури три сета кои се решаваа во тај-брејк.
Алкарас го доби и вториот сет со 7-6 и се чинеше дека отпорот на Зверев е скршен.
Сепак, Германецот се врати во германски стил со максимално борбен карактер. Зверев ги доби драматичните поени во следните два сета, во кои повторно се играше тај-брејк и мечот продолжи во финален петти сет.
Пет и пол часа играа двајцата тенисери, публиката се одушевуваше на секој поен, а максимално драматично беше и во петтиот сет.
Алкарас ја имаше првата меч-топка во 12-тиот гем од финалниот сет и успеа да ја искористи за конечни 7-5 во гемови и пласман во финалето.
Во второто полуфинале на Отвореното првенство на Австралија се среќаваат Новак Ѓоковиќ и Јаник Синер.
