Еурофарм Пелистер е победник на првото издание од Регионалниот ракометен турнир кој премиерно се одржа во Скопје. Битолчани во големото дерби го совладаа Вардар 1961 со 25-23 и со максимален ефект од три победи го подигнаа трофејот.
Ова беше втора победа на Зелено-белите против најголемиот ривал летово, по онаа во Охрид, но и прв освоен трофеј по загубеното финале на турнирот „Крсте Андоновски“.
Финалниот ден беше префрлен во „Јане Сандански“ поради пожар во близина на салата „Борис Трајковски“, но тоа не ја наруши атмосферата. Двете екипи приредија возбудлив натпревар.
Пелистер ја презеде иницијативата, имаше водство и од пет гола, а на полувреме замина со предност од 14-11. Во вториот дел Вардар се обидуваше да се врати, но секогаш кога му беше најпотребно, шампионот од Битола реагираше со нова серија и ја одржуваше предноста. На крајот конечни 25-23 за триумф на Еурофарм Пелистер.
Кај дамите, шампион на турнирот е црногорскиот тим Будуќност, кој исто така забележа три победи на три натпревари.
