Ракометниот шампион Еурофарм Пелистер го доби дуелот за Суперкупот на Македонија против големиот ривал Вардар со 28-27. Победничкиот погодок го постигна Осама Хосни на неколку секунди пред крајот на мечот.
Осама Хосни беше најефикасен на натпреварот со осум погодоци, а Тајник постигна четири погодоци.
Вардар во средината на првото полувреме имаше и четири гола предност (13-9), но Пелистер до одморот намали на 13-12.
Во второто полувреме подобро стартуваа битолчани, кои со погодоците на Хосни и Радивојевиќ успеаја да поведат со 14-13. Потоа следуваше црвен картон за Богдан Радивојевиќ поради удар во лицето на Малус, а и Хориха и Хосни заработија по две исклучувања на двете страни. Некое време натпреварот се одвиваше во ритам „гол за гол“, по што Пелистер поведе со 17-15, но Вардар брзо го израмни резултатот.
Беше неизвесно сѐ до пред крајот, 27-27 на две минути пред крајот. А Хосни на крајот стана херој и му го донесе триумфот на Пелистер.
