Вардар како сè уште актуелен европски ракометен владетел ја дочека денешната ждрепка во ЕХФ Лигата на шампионите за сезоната 2020/21. Црвено-црните пред повеќе од една година го освоија континенталниот трон и уште се таму поради пандемијата со корона-вирусот. Поради опасниот вирус, ЕХФ мораше да ја одложи нокаут-фазата во ЛШ, но и завршницата во Келн, па Вардар уште е во ситуација на европски шампион.
На денешната ждрепка, Вардар беше извлечен како носител во групата А, каде што за противници ги доби: Пари Сен Жермен, Киелце, Порто, Пик Сегед, Мешков Брест, Елверум и Фленсбург.
Во групата Б ќе играат: Барселона, Веспрем, Кил, Алборг, Нант, Мотор, Целје, Загреб.
Сезоната ќе почне на 12-13 септември, ќе се игра двокружно (дома и на гости), а дуелите ќе се играат во среда и четврток.
