Европскиот првак Италија го доживеа првиот пораз на ЕВРО 2024. Подобар ривал во европската класика беше селекцијата на Шпанија која доминираше во текот на целиот меч, а на крајот славеше со 1-0 и тоа со автоголот на Рикардо Калафиори во 55.минута.
Со овој триумф, втор за Црвената фурија, Шпанија веќе обезбеди пласман во осминафиналето придружувајќи и се на домашната селекција на Германија.
Решавачкиот момент се случи во 55.минута. По нафрлувањето од левата страна, Домарума интервенираше, топката удри во коленото на Калафиори и заврши во мрежата на Италијанците.
Нико Вилијамс во 70.минута со удар од далечина ја погоди гредата, а Шпанците имаа уште неколку шанси преку Алваро Мората, Нико Вилијамс и Ајозе Перез. Најдобар поединец кај Италија беше голманот Џанлуиџи Донарума кој го спаси тимот од поубедлив пораз.
