Роџер Федерер без никакви проблеми го помина првото коло од Гренд Слем турнирот во Париз, популарниот Ролан Гарос. Швајцарскиот тенисер лесно со 6:2, 6:4, 6:4 славеше против 74-от тенисер на АТП листата, Лоренцо Сонего од Италија. Мечот траеше нешто повеќе од еден и пол час, што значи дека Федерер ги сочува силите за следните предизвици.
Во второто коло, популарниот „Федекс“ ќе игра против Германецот Оскар Оте кој беше подобар со 3:1 во сетови против Малек Јазири од Тунис. Од досегашните мечеви кои завршија, најдраматично беше меѓу Глигор Димитров и Јанко Типсаревиќ. Бугарскиот тенисер беше голем фаворит и поведе со 2:0 во сетови, но Типсаревиќ не се предаде. Србинот ги доби следните два сета, а во решавачкиот петти сет, Димитров беше подобар со 6:4.
Циципас со 6:2, 6:2, 7:6 го победи Мартере, а во останатите мечеви: Делион – Гунесваран 6:1, 6:3, 6:1, Махут – Сесинато 2:6, 6:7, 6:4, 6:2, 6:4, Нишикори – Халс 6:2, 6:3, 6:4, Бератини – Андухар 6:7, 6:4, 6:4, 6:2, Руд – Гулбис 6:2, 7:6, 6:0, Чилиќ – Фабијано 6:3, 7:5, 6:1.
Главните фаворити за трофејот на Ролан Гарос, 11-кратниот освојувач Рафаел Надал и лидерот на АТП листата, Новак Ѓоковиќ, мечевите од првото коло ги играат утре.
