Роже Федерер беше далеку од својата класа против Кеј Нишикори, загуби со 6:7, 3:6 во првиот меч за него на завршниот мастерс-турнир во сезоната во Лондон и сега треба да се вади против тенисер со кого има негативен биланс.
Доминик Тим е следниот противник на Федерер, а и двајцата стартуваа со порази, па ќе следи битка на сè или ништо.
„Одиграв лош меч против Кеј, иако и двајцата не бевме во посакуваниот ритам. Пропуштив шанса во првиот сет, па потоа продолжив со грешките. Овој турнир е малку поразличен од сите останати. Не играте веднаш на стартот на АТП-турнирите со тенисер од топ 10. Добро е што имам шанса да ги коригирам грешките и да се борам за полуфинале во Лондон“, изјави Федерер.
И Тим загуби со 0-2 од Кевин Андерсон, па сега и тој мора да оди на победа против Федерер. Има две по ред против легендата на светскиот тенис, го победи Роже во Штутгарт и во Рим во 2016 година, а има и еден пораз, истата година во Бризбејн.
Денеска ќе се играат првите мечеви во втората група во Лондон, а премиерата е во 15 часот меѓу Марин Чилиќ и Александр Зверев. По нив, од 21 часот ќе играат Новак Ѓоковиќ и Џон Иснер.
