По вчерашната потврда на Бенфика дека им стигнала официјална понуда за Жоао Феликс од таборот на Атлетико Мадрид, полека се откриваат и деталите околу договорот на талентираниот тинејџер кој ќе го потпише со Јорганџиите.
Самиот трансфер ќе изнесува вртоглави 126 милиони евра, што би бил четврти најскап трансфер во историјата на фудбалот, додека според петгодишниот договор Феликс ќе заработи околу 17,5 милиони евра, или 3,5 милиони евра по сезона, и тоа без дополнителни бонуси. Допрва ќе се дискутираат бонусите за одиграни натпревар, постигнати погодоци, успех во натпреварувањата и слично.
Оваа заработка ќе го направи Феликс еден од најплатените тинејџери во најпопуларниот спорт. Истотака се шпекулира и клаузулата која ќе му биде ставена во самиот договор. Таа најверојатно ќе изнесува 300 милиони евра, па доколку во идинина некој гигант се интересира за Португалецот, ќе треба да урива светски рекорд.
Инаку, актуелната клаузула на Феликс во Бенфика е 120 милиони евра, додека Атлетико во понудата додаде уште шест милиони евра како гаранција дека нема да останат со празни раце. Шпанските медиуми тврдат дека Феликс до 7 јули би требало да започне да тренира со останатите членови на Атлетико, додека медицински прегледи и претставување на јавноста ќе ги обават неколку дена порано.
