Мајсторскиот возачки потег на стартот кога ги претрка болидите на Ферари, му ја донесе победата на Валтери Ботас од Мерцедес, на денешната трка за големата награда на Јапонија во Формула 1. После феноменалниот старт, Финецот имаше отворен простор пред себе и дојде до третата победа сезонава.
Луис Хамилтон десет години не победил на трка на која што тргнал од вториот ред или уште поназад. Традицијата на победи на Мерцедес продолжи и шеста година по ред, но нема да продолжи традицијата тој што победувал на Сузука, да стане и светски првак.
По петти пат во историјата на Формула 1, а трети пат во Јапонија, квалификациите се одржаа во недела, на денот на трката. Невремето беше причина што саботната програма беше презакажана.
На официјалните квалификации, најбрз беше Себастијан Фетел со рекорд на патеката Сузука, а втор беше неговиот клупски колега Шарл Леклер. Тоа беше одличен сигнал, бидејќи традицијата најавуваше оти на Сузука секогаш победувале пилоти кои тргнале од првиот ред. Но, лошиот старт, надополнет со сударот на Шарл Леклер со Макс Ферстапен, најави уште еден неуспех за црвените болиди.
Од Мерцедес знаеја да го искористат тоа. Во финишот, Хамилтон со меки и посвежи гуми силно го притискаше Фетел во битка за второто место, но Германецот се одбрани. Леклер финишираше на шеста позиција.
