Победникот на првото издание на новиот формат на Светското клупско првенство може да заработи 125 милиони долари, објави ФИФА. Вкупниот награден фонд на турнирот изнесува една милијарда долари, а тие средства ќе бидат распределени меѓу 32-та клуба кои ќе учествуваат.
Дополнителни 250 милиони долари во форма на солидарни исплати ќе добијат клубови кои нема да бидат дел од ова издание на натпреварувањето.
Точниот износ зависи и од резултатите во групната фаза, во која секој тим ќе одигра по три натпревари. За победа ќе се доделуваат 2 милиони долари, додека нерешениот исход ќе носи 1 милион.
💡FIFA Club World Cup 2025™: record prize money and unprecedented solidarity to benefit club football
— FIFA Media (@fifamedia) March 26, 2025
– @FIFACWC winners to earn up to 125 USD million
– USD 1 billion prize money to 32 participating clubs
– Target of USD 250 million in solidarity for club football across the… pic.twitter.com/iiRev3buGQ
Пласманот во осминафиналето ќе донесе дополнителни 7,5 милиони долари, а четвртфиналето уште 13,125 милиони. Достигнувањето до полуфиналето на екипите ќе им обезбеди нови 21 милион долари. Победникот на турнирот ќе добие 40 милиони долари само за триумфот во финалето, додека поразениот финалист ќе инкасира 30 милиони.
Од наградниот фонд, 525 милиони долари ќе бидат распределени само за учество на клубовите, додека останатите 475 милиони ќе зависат од спортските резултати на екипите.
