Фондацијата „Правда за играчите“ од Данска поднесе колективна кривична пријава во име на 100.000 фудбалери, откако пресуда на Европскиот суд на правдата откри сериозно прекршување на работничките и пазарните права.
Имено, тужбата ги опфаќа уште пет фудбалски организации, а фондацијата бара надомест во име на играчите кои можеби изгубиле приход или дел од приходот поради трансфер-политики и регулативи.
Фондацијата издаде соопштение со кое ги повикува сите фудбалери и фудбалерки кои играле во Европската унија или Обединетото Кралство од 2002 година наваму да се приклучат на колективната тужба.
❗️ Demandan a FIFA en nombre de 100.000 futbolistashttps://t.co/5AHE2ppyZ5
— Mundo Deportivo (@mundodeportivo) August 4, 2025
Основата за покренување на постапката фондацијата ја гледа во минатогодишната пресуда на Европскиот суд на правдата во случајот на поранешниот играч на Реал Мадрид, Ласана Диара.
Според пресудата, ФИФА со години го прекршувала Законот за конкуренција на Европската унија, како и правото на слободно движење на работниците. Случајот започнал кога Диара сакал да го раскине договорот со Локомотив Москва и да премине во Шарлроа, но според тогашните правила, ФИФА имала можност да го спречи тој трансфер.
Европскиот суд на правдата ги прогласи правилата на ФИФА за незаконски бидејќи ги ограничуваат играчите да ги раскинат договорите без оправдана причина, што директно ги крши основните права на пазарот на труд во ЕУ.
Од фондацијата велат дека со оваа тужба се борат за правата на играчите кои биле оштетени и им биле скратени приходи поради рестриктивните правила на ФИФА за раскинување договори и трансфери.
