Бразилскиот гигант Фламенго има шанса на маестрален начин да ја заврши годината. Фламенго имаше фантастични 20-тина дена, во кои освои две големи титули, а сега атакува и на трет трофеј. Црвено-црните само во 24 часа станаа прваци на Јужна Америка и шампиони во бразилското првенство. Сега нивна цел е да застанат и на тронот на Светското клупско првенство.
Во полуфиналето на турнирот кој се игра во Доха, Фламенго денеска ќе игра против Ал-Хилал. Тимот од Саудиска Арабија се избори за место во полуфиналето откако минимално со 1:0 ја победи Есперанса од Тунис. Ал-Хилал му е добро познат тим на тренерот на Фламенго, Жорж Жесус, кој беше тренер на Саудијците до јануари оваа година, а потоа направи трансфер во Фламенго.
Иако противникот е Ал-Хилал, Жесус повеќе зборуваше за евентуалното финале против Ливерпул, што значи дека е убеден во денешен триумф на Фламенго.
„За сите други, Ливерпул е подобар тим од Фламенго, но ја сум убеден дека ние ќе победиме. Финалето ќе покаже кој е во право“, рече Жесус. Фламенго имаше низа од 28 меча без пораз, но пред патувањето во Доха, тимот загуби убедливо од Сантос со 4:0 во меч кој сепак немаше некое поголемо значење.
Иако Фламенго е голем фаворит, ниту Ал-Хилал нема да се предаде во полуфиналето без борба.
„Тотално е променет стилот на играта од времето кога Жорж беше на чело на екипата. Затоа не мислам дека некој од клубовите ќе има тактичка предност“, вели тренерот на Ал-Хилал, романскиот стратег Разван Луческу.
