Тренерот на Барселона, Ханси Флик, по освојувањето на својот прв трофеј како шеф на стручниот штаб на Каталонците, истакна дека е среќен што играле и победиле како тим.
За Флик ова беше шесто финале како тренер, и шеста победа.
„Натпреварот што го одигравме есеноска во Мадрид ни даде доверба дека можеме да победиме на овој натпревар и тоа го покажавме со тоа што одговоривме и покрај нивниот прв гол. Мораме да учиме од секој натпревар. Сè уште можеме да ги правиме работите подобро, имаме млад тим. Последните неколку недели не игравме добро. Ситуацијата во Лигата не е добра, но веќе разговаравме за тоа во соблекувалната. Го победивме еден од најдобрите тимови во светот и го освоивме трофејот. Среќни сме. Сакаме да победуваме на секој натпревар и ќе се обидеме да го направиме тоа ако е можно“, изјави Флик.
Германецот беше задоволен што дејствувале како екипа.
„Важно ми е како играме. Нема да можеме секогаш да играме како денес, но мора да дејствуваме како тим. Го намаливме бројот на грешки, а кога ја контролираме играта, полесно е. Целите на големите клубови се трофеи“, додаде Флик.
