Роналд Араухо е херојот на Барселона, откако го постигна победничкиот гол во дуелот против каталонскиот ривал Жирона. Барселона победи со 2:1 и во добро расположение ќе патува во Мадрид каде следниот викенд ги чека дуел против вечниот ривал Реал.
Араухо беше резерва против Жирона, а во игра влезе во второто полувреме кога на Барселона ѝ беше потребен гол за триумф. тренерот Ханси Флик буквално му даде задача на Арахуо да игра во напад и да се обиде да постигне гол, што на крајот и се случи.
Не е случајно што Араухо доби задача да игра во нападот, затоа што тој до 16 години играл како напаѓач, а и на тренинзите на Барселона често постигнува голови.
„Знаеме дека Араухо често постигнува погодоци на тренинзите и почувствував дека на мечот против Жирона може да направи разлика. И тој самиот беше уверен дека може да помогне како напаѓач на овој меч. На крајот се покажа дека е така“, открива Флик.
И самиот Араухо открива дека бил подготвен да заигра во нападот.
„Кога тренерот ме праша дали сум подготвен да влезам во игра како напаѓач, во ниту еден момент не размислував и веднаш реков ДА. Му реков дека сум и сигурен дека ќе дадам гол“, вели херојот Араухо.
