Темата околу Винисиус јуниор и понатаму е главен фокус во шпанските медиуми, и покрај тоа што Реал Мадрид се враќа на тренинзи во понеделник. Според медиумите блиски до клубот, постои јасен раскол меѓу изјавите и однесувањето на бразилскиот напаѓач. Имено, додека за време на турнејата во САД јавно изјави дека сака долгорочно да остане во клубот, неговите постапки, според новинарите, укажуваат на спротивното.
Како што пренесува „Дефенса Централ“, претседателот на клубот, Флорентино Перес, планира следната недела лично да се појави во тренинг-кампот во Валдебебас. Целта не е само да го поздрави тимот, туку и да оствари директен, искрен разговор лице в лице со Винисиус, за да добие јасна слика за неговите вистински намери.
Повод за ова се информациите што изминативе недели излегоа во јавноста, според кои Винисиус наводно бара плата повисока од онаа на Килијан Мбапе, нешто што Перес сака да го провери лично.
Претседателот, кој има блиска релација со Бразилецот, смета дека Винисиус направил грешка со тајмингот на неговите барања. Неговата моментална форма не е на ниво на најдобрите денови, кога се најде во трката за „Златната топка“, и Перес планира да му предложи прво да ја врати својата игра на врвно ниво, а дури потоа да се отвори нова рунда разговори околу евентуално продолжување на договорот, кој е валиден до јуни 2027 година.
