Селекторот на Австрија, Франко Фода, беше презадоволен од играта и победата против Македонија. Австрија пред неколку дена со 1:0 ја победи Словенија, а вечерва беше убедлива против Македонија и сега со шест бода се врати во игра за второто место во групата.
„Комплименти до моите играчи. На овие два последни меча бевме под притисок, но покажвме позитивен пристап и освоивме шест бода. Што се однесува до мечот, требаше да водиме во првото полувреме со 3:1, 4:1. Имавме едно мало невнимание и примивме гол. На полувремето ги советував моите играчи да бидат мирни, да внимаваме на нивните контри и да продолжиме со ист ритам. Одигравме одлично, ова е убава победа и сигурно сум задоволен. Бевме концентрирани во сите 90 минути“, вели селекторот Фода.
Запрашан дали Македонија има шанси да се бори за второто место во групата, Фода вели дека дури четири селекции ќе се борат за таа посакувана позиција.
„Знаевме дека Македонија ќе игра 4-4-2, но нивната формација се промени во 3-5-2, па и ние моравме да направиме промени за да парираме. Знаевме по левата страна што може да направат со Барди, Елмас, Пандев, но успеавме да ги неутрализираме. Според сегашниот изглед на табелата, Македонија, Израел, Словенија и Австрија имаат подеднакво шанси за второто место во групата“, заврши Фода.
