Фудбалерот од средниот ред на Унион Берлин, Андраш Шефер, направи голем гест и го спаси својот матичен клуб од банкрот откако на двапати донираше финансиски средства за да не згасне. Шефер е роден во градот Сомбатхељ, Унгарија, само на 10 километри од австриската граница, и токму во клубот од овој град, Халадаш, ги направи своите први фудбалски чекори, иако никогаш не заигра за првата екипа откако уште како младинец направи трансфер во МТК Будимпешта.
„Да бидам искрен, моите најдобри години не ги поминав во овој клуб, но оваа приказна е поголема од незадоволствата од детството. Татко ми сè уште оди на секој натпревар на Халадаш, дури и во Третата лига. Моите родители живеат во Сомбатхељ, јас пораснав тука. Овој клуб на многу деца им дава можност да спортуваат и има многу навивачи, па одлучив ако можам да помогнам, да го сторам тоа. Сакам да истакнам дека не сум јас единствениот кој помогна, уште многу семејства и навивачи издвоија средства колку што им дозволува буџетот. Нивниот придонес е многу поважен од мојот. Пари за спас стигнуваа дури и од навивачи од Англија, Полска и Германија“, рече Шефер.
Долгот на Халадаш поради кој му се закануваше банкрот изнесуваше околу 135.000 евра, а фудбалерот на Унион Берлин донираше 36.000 евра.
