Во Еквадор е започната полициска истрага по киднапирањето на сопругата и синот на 26-годишниот фудбалер Џексон Родригез. Инцидентот се случил во 2:50 часот наутро во средата, во градот Гвајакил, потврди локалниот началник на полицијата Едисон Родригез, пренесува „Мирор“.
Се верува дека дефанзивецот им кажал на властите дека се скрил под креветот кога ги слушнал крадците како ја кршат влезната врата со чекан. Родригез им рекол на полицајците дека погледнал низ прозорецот и ги видел осомничените како си заминуваат во сив пикап.
Полициските извештаи наведуваат дека крадците прво сакале да го киднапираат фудбалерот, но откако не успеале да го најдат, ги киднапирале неговата сопруга и петгодишниот син. Играчот рекол дека не добил никакви закани пред инцидентот.
Градот Гвајакил, главен град на државата Гвајас и место на инцидентот, е во вонредна состојба од јануари 2024 година поради прогласен „внатрешен вооружен бунт“.
Ова не е прв инцидент со киднапирање во населбата Мучо Лоте 2. На 6 јануари се случи киднапирање кое ја потресе локалната заедница. Тогаш вооружени мажи киднапирале сопственик на продавница, му ја скршиле вратата и го претепале. Според локални извори, жртвата наводно платила 10.000 долари за ослободување, иако киднаперите првично барале 50.000 долари.
