Фудбалската репрезентација на Македонија за играчи до 21 година го започна новиот циклус квалификации со убедлив пораз на гостувањето кај Полска. Нашите младинци загубија со 3-0 во Краков, откако домашните со подобра игра во текот на сите 90 минути заслужено ги освоија трите бода.
Резултатот беше отворен во 22-рата минута, кога Пиеко центрираше, но топката удри во Адриан Зенделовски и заврши во мрежата на Љупче Џеков.
Овој резултат стоеше на семафорот се до 65-тата минута, кога Регула зголеми на 2-0, а само три минути подоцна погоди и Пиенко за убедливи 3-0.
Младата македонска репрезентација следниот натпревар од квалификациите за пласман на Европското првенство 2027 го игра во понеделник, кога во Битола ќе гостува селекцијата на Италија.
