Шпанија лесно го совлада Бразил со 36:24 и со тоа си ги оживеа шансите за пласман во полуфиналето од Светското првенство. Уморните „кариоки“ не можеа да го спречат налетот на „фуријата“, откако дуелот со Хрватска ги истроши нивните сили.
Шпанците стартуваа одлично и до половина од првиот дел веќе имаа сигурна предност од +6 гола, па со таа гол-разлика заминаа на паузата. Со исто темпо европскиот шампион продолжи и во вториот дел, а во моменти кога стигнаа до првата двоцифрена предност, јасно беше кој ќе се радува на крајот.
Шпанија во последниот дуел ќе се бори со Германија за пласман во полуфиналето, но само ако домаќинот подоцна загуби во дербито против Хрватска, средба која ќе започне во 18.30 часот.
Норвешка ѝ го нанесе првиот пораз на Шведска со конечни 30:27 на овој светски ракометен собир, па со тоа ги искомплицира работите во групата Ф, каде што до последен ден ќе се бие битка за првите две места. Победата на Норвешка значи дека овие две селекции заедно со вториот домаќин Данска имаат по шест бода, но Данците допрва треба да одиграат меч против Египет.
Данска доколку оствари победа над Египќаните, речиси сигурно е во полуфиналето, а друг исход освен победа ќе значи дека против Шведска ќе се игра на сѐ или ништо.
