Тренерот на Аталанта, Џанпјеро Гасперини, го прокоментира поразот од 2-3 против Реал Мадрид на домашен терен во Лигата на шампионите. Искусниот стратег смета дека ваквите порази му помагаат на тимот да се развива.
„И двата тима имаа цел да играат фудбал, без одложувања или симулации. И ние и Реал Мадрид ја баравме победата користејќи ги нашите силни страни. Се доби навистина квалитетен натпревар“, изјави Гасперини.
„Секако, сега сме разочарани, но од вакви дуели можеме многу да научиме. Ни недостигаат ситни детали, но игравме храбро против еден голем тим. Загубивме, но не заостанувавме во играта, што ќе ни помогне да направиме уште еден мал чекор напред“, дополни тренерот на Аталанта.
Тој се обиде да најде позитивни моменти и во поразот.
„Покажавме многу добри работи. Тоа нè мотивира да продолжиме да се развиваме. Во некои моменти малку побавно ја пренесувавме топката во половината на противникот, па Реал Мадрид брзо се поставуваше во одбрана. Жал ми е што нашата долга серија на победи заврши. Знаевме дека можеме да израмниме. Да, тажни сме што не успеавме, но беше вистински фудбалски празник, што е една од нашите главни цели“, додаде Гасперини.
