Иван Перишиќ е во центарот на вниманието на хрватската јавност откако Џенаро Гатузо го отстрани од првиот тим на Хајдук пред гостувањето кај Локомотива. Италијанецот потоа изјави дека Перишиќ побарал заминување, а сега се појави информација дека наводно го контактирала Барселона.
Перишиќ на почетокот на годината пристигна од Тотенхем во Хајдук и неговото враќање во клубот од „Пољуд“ ја крена на нозе цела Далмација, но ситуацијата се промени само за неколку месеци.
Искусниот фудбалер неодамна потпиша договор со Хајдук на уште една сезона, но откако Гатузо го избрка од првиот тим поради кршење на дисциплината, сè погласни се приказните за заминување на Перишиќ.
Бајката на Перишиќ во Сплит полека се претвора во вистински кошмар, а не му помогна ниту Гатузо, кој синоќа, по натпреварот против Локомотива изјави дека искусниот играч пред 20 дена му соопштил дека сака да го напушти клубот.
Навивачите на Хајдук му го свртеа грбот на искусниот фудбалер и го навредуваа на социјалните мрежи повикувајќи го да го напушти клубот, иако Перишиќ сè уште не ја кажал својата страна на приказната.
Сепак, во екот на сите овие случувања во Хајдук, јавноста беше изненадена од шпекулациите дека целиот овој хаос започнал затоа што наводно Барселона го контактирала Перишиќ.
Познато е дека Перишиќ успешно соработуваше со Ханси Флик во Баерн Минхен и наводно тој би сакал да го види Хрватот во Барселона како резервна опција за бековските позиции.
Оваа информација ја изненади јавноста, но и навивачите на Хајдук бидејќи звучи навистина неверојатно и многумина веднаш изјавија дека не веруваат во приказната дека Барселона покажала интерес за Перишиќ и дека поради тоа сака да си замине.
Перишиќ неодамна се врати по тешката повреда на коленото и јасно е дека сè уште не е ни блиску до некогашната форма, поради што се мачеше да се избори за место во почетниот состав на Хајдук.
