Младиот играч за врска на Барселона, Гави, се промовира како еден од оние фудбалери кои треба да е иднината на каталонскиот гигант. Гави на својот грб на дресот го носи бројот 30, истиот со кој дебито во првиот тим пред речиси две децении го направи и Лионел Меси.
Сепак, Гави досега веќе требаше да го има сменето бројот и за него е резервирана „шестката“, која беше на грбот на сегашниот тренер на Барселона, Чави. Токму затоа во актуелниот тим на Барселона никој не ја носи шестката, а Гави иако е стандарден во првиот тим, не смее да ја носи шестката.
Гави има само 18 години, а веќе има одиграно 74 натпревари за Барселона, но неверојатно е дека уште не е регистриран како фудбалер во сениорскиот тим. Тоа е така затоа што Барселона уште е далеку над „селери капот“, кој е дозволен, па Гави едноставно не може да биде регистриран како фудбалер на сениорскиот тим и настапува како играч од младинската школа.
Според правилата на Примера дивисион, само играчите кои се регистрирани во сениорскиот тим може да носат броеви на дресовите од 1 до 25, а оние кои се од младинската школа може да одберат други бројки.
