Најдобриот ракометар на Данска Матијас Гидсел е задоволен по победата над Македонија. Гидсел вели дека Данците цел меч биле стоосто фокусирани затоа што знаат дека нашиот селектор Кирил Лазаров може да ги изненади.
„Влеговме малку нервозно во мечот, сакавме да ја почувствуваме атмосферата во салата, која беше навистина фантастична. Исто така, знаевме дека Кире Лазаров ќе стори нешто за да нѐ изненади на тактички план. Онаа одбрана, зоната 5-1 во првото полувреме, за момент предизвика да не играме онака убав ракомет како вообичаено. „Фластерот“ на мене малку нѐ исфрли од ритам, но Лауге и Питлик потоа го искористија просторот што се отвори со таа зона и полесно ги решававме акциите. Македонија во секој случај покажа квалитет, верувам дека со подобра офанзивна игра би можела да се носи со Португалија“, изјави данскиот ракометар веднаш по победата над Македонија во првото коло од Европското првенство на кое тие се домаќини.
