Маркус Гинјард, кој беше еден од најзаслужните за титулата на Работнички во минатата сезона, потпиша договор со романскиот прволигаш ЦСМ Орадеа. Искусниот 31-годишен кошаркар, првпат ќе игра во Романија.
Човекот кој студираше на Универзитетот Северна Каролина (таму учеше и Мајкл Џордан) и пет години играше за славниот тренер Рој Вилијамс, а во 2009 освои титула во НЦАА лигата. Гинјард не замина во НБА, туку почна европска кариера, а станици му беа Германија, Израел, Полска, Украина, Велика Британија, Грција, Франција, повторно Полска, Македонија, и сега Романија.
Гинјард во минатата сезона, тимот на Марин Докузовски, имаше просек од 15,9 поени, 5,1 скока и 2,2 асистенции по меч.
Во Орадеа, Гинјард треба да биде наследник на Шон Барнет, кој си замина поради здравствени проблеми. Со екипата на Орадеа, ќе игра и во Лигата на шампиони на ФИБА. Освен тоа што е одличен кошаркар , Маркус се покажа и како добар човек и хуманитарец.
Работнички претстојната сезона ќе ја почне со само еден странец, Бугаринот Чавдар Костов, а ако на клубот му биде симната забраната за купување странски играчи, ќе може дополнително да се засили.
