Два меча се денеска на програмата во рамките од 15. коло во Прва македонска фудбалска лига, а главен проблем е какви ќе бидат терените за игра. Пелистер во Битола ја пречекува Македонија Ѓорче Петров, а Брера во Струмица е домаќин на Тиквеш.
Терените на двата стадиони, во Битола и во Струмица се во лоша состојба, а со оглед на лошото време и постојаните врнежи од дожд, ќе биде вистински предизвик фудбалерите да се снајдат на такви терени. За тоа како изгледаат терените во мак-фудбалот и тоа на екипите од Прва лига се покажа вчера, кога Силекс во Кратово на ужасен терен и во тешки услови играше против Арсими (гостите славеа со 3:1).
Вчера на стадионот во Струмица требаше да игра женската макеедонска репрезентација до 19 години, но поради лошите временски услови и лошиот терен, дуелот не се одигра. Денеска Брера треба да игра против Тиквеш. Струмичани имаат 16 бодови, а еден бод помалку има Тиквеш. Кавадарчани сезонава во седум гостувања имаат дадено само четири гола.
Во Битола, Пелистер игра против Македонија ЃП во дуел на кој двата тима имаат по 14 бода досега во 14 одиграни средби.
Во Втора лига уште вчера беше донесена одлука да се одложат пет меча од денешната програма, па нема да се играат средбите меѓу: Детонит – Скопје, Слога (В) – Охрид, Осогово – Новаци и Кожуф – Вардар (Н) и Големо Коњари – Тетекс.
