Српскиот тенисер Новак Ѓоковиќ е блиску до одлука да ја продолжи соработката со новопечениот тренер Енди Мареј, со чија помош, како што стојат работите, ќе соработува и на претстојните два гранслем-турнири во текот на актуелната сезона, пренесуваат британските медиуми.
Ѓоковиќ и Мареј ја започнаа соработката минатиот месец на Отвореното првенство на Австралија, кое Ѓоковиќ го заврши со предавање на дуелот против Александар Зверев во полуфиналето поради повреда, а изминативе две недели владееше неизвесност дали таа ќе биде продолжена.
Во моменти кога фокусот на Новак е насочен кон закрепнување од повредата и подготовка за претстојниот турнир во Доха, угледниот „Тајмс“ објави информација, која има значително влијание врз продолжувањето на кариерата на Ѓоковиќ.
Турнирот во главниот град на Катар започнува наредниот понеделник, па во деновите што следуваат ова тврдење ќе биде потврдено или демантирано.
Она што е сигурно, а воедно беше и видливо на претходниот турнир во Мелбурн, е дека Ѓоковиќ и Мареј одлично се вклопија, па нема причина да не ја продолжат соработката.
