Новак Ѓоковиќ на својот прв официјален меч по поразот од Карлос Алкарас во полуфиналето на Отвореното првенство на САД го победи Хрватот Марин Чилиќ со 7-6, 6-4 во второто коло на Мастерс турнирот во Шангај.
Како по традиција, Србинот играше со црвен дрес, во бојата на знамето на Кина, а овој меч со Чилиќ беше историски затоа што на Мастерс 1000 турнирите досега се немаше случено еден против друг да играат двајца тенисери ветерани кои заедно имаат 75 години и 139 дена. Ѓоковиќ има 38, а Чилиќ 37 години.
Чилиќ, кој само двапати во 22 меѓусебни дуели славел против најдобриот на сите времиња, даде силен отпор во првиот сет, имаше шанса и да го освои кога испушти две брејк топки при 5-5, но сепак Новак се извлече и го доби сетот во тај-брејк.
Во вториот сет немаше толкава драма, Србинот навреме направи брејк на сервис на противникот (тоа беше единствен брејк на мечот) и рутински ја одбрани предноста иако во последниот гејм Чилиќ имаше брејк шанса.
Во следното коло Ѓоковиќ ќе игра со германскиот квалификант Јаник Ханфман, кој е 159-ти на АТП-листата, а до третото коло се проби со изненадувања против Сонего и 26-тиот носител Тијафо.
