Новак Ѓоковиќ без никакви проблеми, со 2:0 во сетови го победи Гаел Монфис, во осминафиналето од Мастерс турнирот во Синсинати. Мечот траеше само 68 минути, а Србинот со феноменална игра победи лесно со 6:3, 6:2.
Популарниот Ноле едноставно е нерешлива загатка за Монфис затоа што ова беше нивeн 19-ти меч и во сите 19 победува Ѓоковиќ. Тоа е убедливо најдобриот скор во историјата на тенисот што еден играч го имал против ист противник.
Рафаел Надал има 17:0 против Ришар Гаске и досега беше корекордер со Ѓоковиќ, но Србинот сега е еден чекор понапред. Серија од 17:0 во победи имаат неколку тениски легенди. Роџер Федерер има наредено 17 победи од исто толку меча против Михаел Јужни и Давид Ферер, Бјорн Борг против Витас Герулаитис, како и Иван Лендл во дуелите со Тим Мајот.
https://twitter.com/i/status/1692360286454288633
Во првиот сет резултатот беше 3:3, а потоа следуваше многу подобра игра на Ѓоковиќ и со три врзани гејма го доби сетот со 6:3. Доминацијата на Србинот продолжи и во вториот сет, кога нареди пет гејма по ред и стигна до 5:0, но потоа Ѓоковиќ малку се опушти, му дозволи на Монфис да освои два гејма, па на крајот резултатот беше 6:2.
Следен ривал на Ѓоковиќ ќе биде Тејлор Фриц, кој водеше со 5:0 во првиот сет против Лајовиќ, а Србинот потоа го предаде мечот.
