Српскиот тенисер Новак Ѓоковиќ беше во ВИП ложата на ОАКА Арената во Атина, каде што го гледаше натпреварот од 7. коло на Евролигата помеѓу Панатинаикос и Макаби Тел Авив. Неговото присуство не остана незабележано и предизвика различни реакции кај домашните навивачи, кои дури и го исвиркаа.
Како што објави грчкиот портал 1908.gr, Ѓоковиќ, познат како голем љубител на кошарката, го привлече вниманието на сите присутни во салата.
„Новак Ѓоковиќ, кој моментално е во Атина, го гледаше натпреварот помеѓу Панатинаикос и Макаби во живо. Српската тениска легенда ја искористи можноста да ја почувствува атмосферата во ОАКА Арената“, се наведува во извештајот.
Сепак, неговото доаѓање предизвика и одредени контроверзии, бидејќи Ѓоковиќ е познат како голем обожавател на Црвена Звезда, клуб кој традиционално одржува пријателски односи со Олимпијакос, најголемиот ривал на Панатинаикос.
Грчките медиуми потсетија и на снимка од „Белградска арена“ на која Ѓоковиќ претходно испеа популарна песна од навивачките групи Делије и Гејт 7, што не остана незабележано од навивачите на Гејт 13.
From Belgrade to Athens, the 🐐 of tennis is just like all of us FR #EveryGameMatters pic.twitter.com/ShUQJr6oNP
— EuroLeague (@EuroLeague) October 28, 2025
Ѓоковиќ ќе настапи на АТП турнирот во Атина следната недела, кој неодамна беше преместен од Белград во грчката престолнина.
