Новак Ѓоковиќ лесно дојде до пласман во четвртфиналето на Ролан Гарос, со оглед на тоа дека за противници имаше тенисери кои не се ни во топ-50 на светската ранг-листа. Првиот вистински предизвик ќе му биде мечот против Александер Зверев, кој во моментов е подоброрангиран од него, а Германецот беше на трибините на мечот на Ѓоковиќ против Нори.
Зверев објави фотографија со трофејот од Лигата на шампионите, кој беше изложен на теренот на којшто играа Ѓоковиќ и Нори, а под фотографијата напиша: „Не очекував дека ќе те видам тука“, порака која се однесуваше на пехарот.
Веднаш следуваше коментар од Новак Ѓоковиќ, кој му реплицира: „Кажи им ја вистината. Беше тука за да ја шпионираш мојата игра. Трофејот беше само изговор“.
Ѓоковиќ и Зверев се долгогодишни пријатели и коментарот на Србинот е само шега. Нивниот четвртфинален дуел на Ролан Гарос на програмата е во среда, во 11 часот.
