Новак Ѓоковиќ нема да игра на последниот гренслем-турнир во Њујорк, на Отвореното првенство на САД, ако остане невакциниран до крајот на август, кога почнува турнирот.
Процедурата за големиот тениски ас и за влез во САД ќе биде иста како и со проблематичната авантура што ја преживеа во Мелбурн, за учество на Отвореното првенство на Австралија, кога по десетдневно малтретирање, не успеа да настапи на гренслемот на почетокот на годинава.
И сега без вакцина ќе му треба чудо, односно валиден медицински доказ дека не смее да се вакцинира против Ковид, но уште отсега се најавува дека и тоа нема да биде доволно.
Тениската федерација на САД, или познатата USTA, објави дека нема да ризикува и да бара од државата специјален третман за спортистите со медицинска белешка.
Ѓоковиќ мина цела голгота во Мелбурн со таков документ и откако првично добил зелено светло за настап, документацијата при слетувањето во Мелбурн му беше одбиена, па му ја поништија и визата.
Заврши во хотел за мигранти, па имаше судење на кое му беше вратена визата, дури и тренираше на комплексот во „Мелбурн парк“, каде што се играат мечевите на Отвореното првенство на Австралија, но повторно му беше одземена визата за влез во државата и беше депортиран назад.
Искуството на Новак беше горчливо, цел свет ја следеше драмата што траеше десеттина дена и се претпоставува дека тој воопшто нема да се обидува да влезе во САД со документација за медицинско изземање од вакцинирање.
