Италијанецот Јаник Синер е прв финалист на Отвореното првенство на Австралија во тенис. Тој со 6-1, 6-2, 6-7, 6-3 го совлада првиот фаворит Новак Ѓоковиќ и покажа дека е најнезгоден ривал за Србинот во последните година дена.
На Новак 18 години му се немаше случено толку лошо да ги одигра првите два сета во Мелбурн, се виде дека не е ни бледа сенка на тенисерот кој има 10 титули на овој гранслем. Во тај брејкот од третиот сет, Ѓоковиќ спаси една меч-топка и го доби сетот, па неговите фанови помислија дека е можен епски пресврт, но денеска не беше денот.
Ѓоковиќ му подари брејк на Синер во гејм во кој Ноле водеше со 40-0 и тука некаде се најави крајот на доминацијата на Ѓоковиќ, кој 2.195 дена немаше пораз на Отвореното првенство на Австралија.
