Неделата којашто измина беше многу возбудлива на спортски план. Освен планетарното лудило со фудбалот, овојпат во фокусот беа други два спорта. Традиционално, крајот на јануари е резервиран за тениските возбудувања и за завршницата на некое од ракометните големи натпреварувања. Така беше и овојпат.
Трофејот од првиот гранслем-турнир за 2026 година заврши во рацете на Карлос Алкарас. Младиот Шпанец испиша историја станувајќи најмладиот тенисер кој успеал да триумфира на сите четири гранслем-турнири.
Сепак, мечевите во Мелбурн ги одбележа и најтрофејниот Новак Ѓоковиќ. Иако во мај ќе полни 39 години, Србинот повторно покажа дека не се предава против многу помладите од него. Ѓоковиќ во полуфиналето по три и пол часа борба го победи Јаник Синер, додека во финалето даде достоен отпор против Алакрас, но загуби со 3:1.
Ќе беше светско чудо да ги победи Синер и Алакрас само во три дена, но и со пораз од Шпанецот, Ѓоковиќ потврдува дека ги поместува границите во овој спорт, станувајќи најстариот финалист на ОП на Австралија. Едноставно, освојувачот на 24 гранслем-трофеи уште еднаш ги разнежни тениските романтичари.
МАКЕДОНИЈА ЈА ИСПОЛНИ МИСИЈАТА НА ТУРНИРОТ НА КОЈ ШАМПИОНОТ „ПРЕДВРЕМЕ“ БЕШЕ ПОЗНАТ
Синоќа се спушти завесата и на Европското првенство во ракомет, а Данска е новиот континентален владетел. Со победата од 34:27 над Германија во финалето, Данска ги обездини сите три највредни трофеи затоа што од претходно беше и светски и олимписки првак. Едноставно, Данците доминираа на турнирот, ги мелеа противниците, само со еден кикс во групната фаза кога загубија од Португалија.
Македонија, која традиционално е дел од најдобрите на ЕП, одлично си ја заврши својата работа. Нашата селекција заврши на 14-тото место и се избори да биде во првиот барабан на ждрепката за баражот за Светско првенство, каде што сме фаворити и ќе играме против подобриот од Украина и Словачка.
АРСЕНАЛ И ИНТЕР ГРАБАТ КОН ТИТУЛИТЕ, РЕАЛ СЕ НАМАЧИ НО ПОБЕДИ, А БАЕРН СЕ ОПУШТИ
Од фудбалските возбудувња, најинтересно беше во Топ 5 лигите. Арсенал, кој повеќе од 20 години мечтае за титулата во Премиер лигата, ја зголеми предноста на шест бода во однос на вториот Манчестер сити.
Во Серија А во Италија, Интер беше без грешка кај Кремонезе, но победија и Наполи и Јувентус. ПСЖ се врати на првото место во Франција и сега ја држи предноста од два бода пред Ленс.
Во Бундеслигата, Баерн како да се опушти, па киксира второ коло по ред, овојпат играјќи 2:2 кај Хамбургер. Фактот дека во последните две кола Баерн освои само еден бод, а Борусија максимални шест, дојде до намалување на огромната предност, па разликата меѓу првиот и вториот е шест бода.
Како што се очекува, најголема битка водат Барселона и Реал Мадрид. Каталонскиот гигант ја задржа предноста од еден бод во однос на Кралевите, кои вчера се намачија и со гол од пенал во 100-тата минута го победија Рајо Валјекано.
