Новак Ѓоковиќ се пласираше во третото коло на Австралија опен, откако со 3:1 во сетови го победи Енцо Куако од Франција. Во меч кој траеше речиси три часа, Ноле без проблем го доби првиот сет убедливо со 6:1, но тоа следуваа проблеми.
Србинот се пожали на повреда во вториот сет, тоа го искористи противникот, па Куако направи изненадување откако го доби вториот сет со 7:6. Сепак, тоа беше се што успеа да направи Французинот. Во третиот сет, Србинот повторно заигра на врвно ниво, го доби сетот со 6:2 и целосно го скрши отпорот на противникот. Последниот сет фаворитот го доби со убедливи 6:0. Во третото коло Ѓоковиќ ќе игра против Григор Димитров од Бугарија.
Во текот на мечот, Новак во еден момент се налути на луѓето од неговиот табор и луто им се развика. Потоа во третиот сет, Ѓоковиќ имаше проблеми и со провокации од трибините. Неколку навивачи константно го деконцентрираа Србинот, па дури по жестоките протести на Новак, обезбедувањето на крајот ги избрка од трибините.
