Македонија ја надигра Словенија, но не успеа да победи на пријателскиот меч во Скопје. Гостите погодија за израмнување на 1:1 во последните моменти од судиското продолжение.
Македонија поведе по одличната акција во 55-тата минута, што маестрално ја изведоа асистентот Езџан Алиоски и стрелецот на победничкиот гол Елиф Елмас.
Алиоски прекрасно нафрли од својата позиција како лево крило, а Елмас од спротивната страна од прва упати прецизен удар, што заврши во мрежата на Словенците.
Македонија доминираше во второто полувреме, откако Словенија беше рамноправен ривал во првиот дел. Имавме неколку зрели шанси во продолжението и пред и по голот на Елмас, но сепак не успеавме да постигнеме уште некој погодок за победа.
Домен Чрнигој погоди во 97-мата минута за Словенија за конечни 1:1.
Селекторот на Македонија, Игор Ангеловски, успеа и да ја провери формата и на резервните играчи, па дури шестмина настапија во второто полувреме.
Македонија ќе игра уште еден тест-меч против Казахстан на 4 јуни, а потоа следува патот за Букурешт на 8 јуни. Таму ќе играме два меча на ЕП, против Австрија на 13 јуни и со Украина на 17 јуни, а потоа ќе патуваме за Амстердам на 21 јуни на дуел со Холандија.
