Македонската ракометна репрезентација за играчи до 19 години извојува важна победа над Австрија од 29-22 бидејќи вака останува разигрување за 9-12 место, а пораз ќе значеше пласман од 13-то до 16-то место на Светското првенство кое се игра во Хрватска и на кое учествуваат 32 селекции.
Македонскиот тим беше одличен во првото полувреме кое го доби со 14-8, а во вториот дел рутински се одржуваше предноста и на Австријците не им беше дозволено посериозно да се доближат.
Денеска против Австрија најрасположени поединци беа Калајџиески и Белистојановски со по 6 гола, ги следеше Димевски со 5.
Поразите од скандинавските Данска и Норвешка ја отпишаа Македонија од место меѓу осумте најдобри, но ракометарите покажаа дека имаат квалитет и во најлош случај ќе бидат 12-ти на светот, што е добар резултат.
