Во пресрет на последните осум кола во италијанската Серија А, Милан е во незавидна ситуација. Некогашниот италијански првак има 47 бодови и моментално е на деветото место на табелата, што значи дека е во опасност да не се избори за позиција која води излез во Европа за следната сезона.
Милан вечерва на „Сан Сиро“ ќе игра дерби дуел против Фиорентина која е една позиција пред Милан, но има четири бодови повеќе. Тоа значи дека ако домаќините киксираат вечерва, ќе биде многу тешко потоа да се бркаат позициите за висок пласман. Тами Абрахам од кого се очекуваат погодоци за да ги израдува фановите на Милан е оптимист дека може да се победи Фиорентина.
„Секој меч до крајот на сезоната за нас ќе биде како финале. Секој дуел ќе биде многу важен. Сакаме да одиграме добро. Ние сме Милан, а Милан е клуб кој секогаш сака да игра во Европа и да освојува трофеи. Фиорентина има квалитетен состав, но ние мора да веруваме во нашите квалитети и да се бориме до крајот. Јас сум таков човек“, вели Абрахам.
Во последните 10 дуели на овие два тима, Милан има шест победи, а Фиорентина се радувала само два пати.
