Франција е во полуфиналето на Лигата на нациите откако на пенали ја елиминира Хрватска, а најзаслужен за тоа е голманот Мајк Мањан, кој ги одбрани пеналите на Батурина и Станишиќ. Мањан и на првиот меч во Сплит одбрани пенал, па по мечот откри која е неговата тајна.
„Сакавме да им се реваншираме. Хрватите на првиот натпревар правеа што сакаат и тоа многу нѐ повреди. Знаев дека мора да бидам подготвен. Тоа беше психолошки двобој, играчите даваа сè од себе, требаше да имам бистра глава. На пеналите треба да се заземе простор на голот и да ја имаш контролата. Мене тоа ми успеа и поминавме понатаму. Сè е во главата, во погледот. На првиот натпревар бранев додека ми светеа со ласери во лицето. Сакам да му пречам на изведувачот, посебно затоа што голот му изгледа преголем. Добро ми одеше на овој меч, во тој сегмент бев успешен. Се надевам дека така и ќе продолжам“, рече Мањан.
