Работнички имаше успешна полусезона во фудбалскиот шампионат на Македонија. Првата полуетапа клубот од Дебар Маало ја заврши во водечкото трио на табелата освојувајќи 37 бода, идентично како и Силекс и Шкендија.
Скромниот Горан Станиќ заслугите им ги припишува на фудбалерите, но секако дека и неговото одлично водење на тимот заедно имаат и тоа каков ефект во одличните резултати.
Работнички го заокружи есенскиот дел во Првата лига само со еден пораз, на гости кај актуелниот шампион Струга Трим Лум, а оствари девет победи и седум ремија.
„Мора да бидеме задоволни од ефектот во првиот дел од сезоната. Многумина пред почетокот на првенството и не веруваа дека Работнички може да се бори за врвот, но покажавме дека со напорна работа и голема верба во своите квалитети едноставно сѐ е можно. Сега амбициите секако се поголеми, а Работнички се вбројува меѓу кандидатите за пласман во Европа и е еден од аспирантите за титулата. Но, кај нас нема еуфорија, цврсто стоиме на земја и свесни сме дека мораме да продолжиме да работиме уште понапорно во периодот што следува затоа што досега ништо не сме направиле. Ова е само една контролна точка во првенството, помина половина од шампионатот, но напролет ќе биде уште потешко да се стигне до победа против кој било противник и да се освојуваат бодови“, анализира Горан Станиќ, шефот на стручниот штаб на Работнички.
Тој и Александар Васоски се тренерите кои излегоа во фокусот со постигнатите резултати, па главното прашање е која е тајната на успесите на Работнички.
„Како што напоменав, цврсто стоиме на земја, ги знаеме нашите квалитети, веруваме во способностите на тимот, имаме клупска хемија, изградивме победнички дух и одиме чекор по чекор. Секој нареден натпревар е најважен, се радуваме на успесите, но и се обидуваме веднаш да ги исправиме грешките што се појавуваат во текот на настапите. Би сакал речиси сите заслуги да им ги припишам на фудбалерите, тие се оние кои се борат на теренот, максимално се трудат да ги применат на теренот идеите на стручниот штаб и тоа дава резултати. Кога е така, ќе се обидеме да не менуваме многу, но и да се подготвиме уште подобро за вториот дел од сезоната и да тргнеме силно во битката за бодови од средината на февруари“, истакнува Станиќ.
Работнички по пауза од неколку сезони повторно е во трка за излез во Европа и во конкуренција за шампионската титула.
„Тоа не го чувствуваме како притисок туку како можност што сакаме да ја грабнеме и да ја искористиме. Ги респектираме и сите конкуренти, но знаеме колку можеме, јас постојано им велам на фудбалерите дека треба да бидат свесни за квалитетот со којшто располагаат и драго ми е, горд сум што тие успеваат таа самодоверба да ја покажат и на натпреварите“, вели тренерот на Работнички.
Горан Станиќ не е голем фан на спортското обложување, но со драго срце прифати да направи хуманитарен тикет со надеж дека ќе успее да го погоди и добивката да биде донирана таму каде што е најпотребно во моментот.
„Не се обложувам, но секако дека го следам елитниот европски фудбал, па ќе се обидеме да ги погодиме типовите“, потенцира Горан Станиќ.
