Гранада и Хуеска одиграа супер интересен меч од шпанската Примера кој заврши 3-3. Хуеска остана единствен тим без победа сезонава, иако поминаа веќе 12 кола. Се чинеше дека малерот ќе биде разбиен, водеа со 3-1 до 87-ма минута, но тогаш домашните дадоа два гола со глава и изедначија, па двата тима мораа да се задоволат со бод.
Гранада прекина црна серија од три порази по ред, а бодот ги однесе андалузијците пред Барселона на табелата.
Третиот гол за Хуеска го даде Оказаки, кој стана деветти Јапонец што дал гол во шпанското првенство. Оказаки даде гол од 38 метри кога го погоди празниот гол, бидејќи голманот на Гранада беше излезен многу напред, но иако се мислеше дека тој гол ќе вреди три бода, одбраната не го положи испитот во финишот.
Во последните секунди од судиското продолжение, ветеранот Хорхе Молина кој даде гол за 2-3, ја погоди стативата и за малку не се случи историски пресврт. Молина е играч кој против Хуеска има давано гол во прва, втора и трета шпанска лига.
