Ракометарите на Охрид направија огромен чекор кон пласман во следната фаза од ЕХФ Европскиот куп, откако на гостински терен го декласираа тимот на Баку со неверојатни 44–11. „Гладијаторите“ одиграа натпревар за паметење и практично го решија двомечот уште по првиот дуел.
Од самиот почеток беше јасно дека има само еден квалитетен тим на теренот. Охриѓани започнаа фуриозно, поведоа со 5–1, потоа ја зголемија предноста на 10–3, а на полувремето веќе имаа недостижни 24–7.
Еден од клучните фактори за убедливата победа беше голманот Чаневски, кој блескаше и забележа 22 одбрани, со феноменална успешност од 68%. Неговите интервенции целосно го деморализираа противникот и му овозможија на Охрид да ја одржува високата разлика.
Во второто полувреме, тренерот Ројевиќ реши да им даде шанса на сите ракометари, но тоа не ја намали доминацијата – напротив, разликата само продолжи да расте. Натпреварот заврши со дури 33 гола предност во корист на македонскиот претставник.
Најефикасен во редовите на Охрид беше Иванковиќ со 9 погодоци, додека Ојлески и Ѓукиќ постигнаа по шест погодоци. Кај гостите единствен што се истакна беше Мамадов, стрелец на четири гола.
Реваншот, кој ќе се одигра утре од 18 часот во СРЦ „Билјанини Извори“, ќе биде само формалност, бидејќи веќе е јасно дека Охрид сигурно чекори кон топ 32 екипите во ЕХФ Европскиот куп.
