Македонскиот претставник ГРК Охрид денеска (16 часот) во Атина го игра првиот натпревар од четврфиналето на Купот на ЕХФ против Олимпијакос. Овој дуел треба да даде одговор која екипа ќе биде поблиску до полуфиналето, со оглед дека реваншот се игра во Охрид на 4 април.
„Нѐ очекува тежок натпревар против Олимпијакос. Добро работевме изминатата седмица и подготвени сме за овој дуел. Ќе дадеме сѐ од себе за да оствариме што е можно подобар резултат пред реваншот во Охрид“, изјави Џанфранко Прибетиќ.
Македонскиот тим наиде и на лош прием од Грците, со оглед дека официјалниот тренинг го одржа во затворен балон, наместо во салата каде што ќе се игра денешниот дуел. п
Пред мечот, Охрид се договори со Олимпијакос, на барање на ЕХФ да нема гостински навивачи. Првиот меч се игра денеска во Атина во салата „Илиуполи“ од 16:00 часот, додека реваншот е во СРЦ „Билјанини Извори“ на 4 април од 18:00 часот.
