Менаџерот на Манчестер сити, Пеп Гвардиола, не го криеше разочарувањето по ремито 2-2 против Нотингам форест во Премиер лигата. Со овој резултат Граѓаните повторно заостануваат седум бода зад лидерот Арсенал во трката за шампионската титула.
Шпанскиот стратег смета дека неговиот тим пропуштил шанса порано да го реши натпреварот и да ги обезбеди трите бода.
„Во Премиер лигата никој не простува кога ќе престанеш да играш. Требаше да бидеме поконкретни и да го ‘затвориме’ натпреварот кога ги имавме шансите. Да примиме два гола од ситуации за кои знаевме дека се опасни навистина е болно. Кога ќе оставиш простор на тим што се бори за опстанок, вакви работи се случуваат“, изјави Гвардиола.
По ова реми, разликата зад лидерот Арсенал повторно изнесува седум бода, иако Манчестер сити има натпревар помалку.
„Во моментов не размислувам за табелата или пласманот. Повеќе ме интересира како играме. Ако не сме константни во текот на сите 90 минути, нема да освојуваме титули. Заостануваме, но мора да ја прифатиме реалноста и да се подготвиме за следниот предизвик“, додаде шпанскиот тренер.
На крајот, Гвардиола им оддаде признание и на фудбалерите на Нотингам форест за нивната борбеност.
„Фудбалот не се игра секогаш на ист начин. Мора да се приспособуваме. Му честитам на Нотингам, беа дисциплинирани и ги искористија своите моменти. Ние имавме иницијатива, но добрата игра без голови не носи бодови“, заклучи стратегот на Сити.
