Манчестер сити игра во катастрофална форма и веќе има заостанување од 14 поени позади лидерот Ливерпул, но и натпревар повеќе, па предноста може и дополнително да се зголеми. „Граѓаните“ се на седмата позиција во Премиер лигата, а Пеп Гвардиола вели дека друи сега сфаќа што направиле претходните сезони, кога четирипати по ред го освојуваа трофејот.
„Понекогаш очекувате дека полесно и брзо ќе ја поправите незгодната ситуација, но истотака понекогаш ви треба многу повеќе време, но јас нема да се откажам. Сакам да бидам тука, сакам да ја променам ситуацијата. Сега одиме во Лестер, што е исто тежок натпревар. Ќе се обидеме да одиграме добар меч и играчите ќе бидат подготвени за тоа. Го гледам тимскиот дух, како тренираат, колку се фокусирани. Секако дека сакам да ја вратиме формата. Не сакам да ги разочарам моите луѓе, клубот, навивачите и луѓето кои го сакаат овој клуб, но моментано имаме лоши резултати. Ќе се вратиме порано или подоцна, но вистината е дека поради моменталната ситуација, се потсетувам колку беше добро во минатото. Дури сега сфатив што направивме. Очекувате дека малку ќе паднете, но ова не го очекувавме. Главната причина е тоа што имаме седум или осум повредени фудбалери. Играњето на натпревари на секои три дена станува премногу тешко.“ – вели Гвардиола.
